Uvdal stavkyrkje

Uvdal stavkyrkje fascinerer tusenvis av besøkande kvart år. Ho er ikkje av dei største eller mest avanserte stavkyrkjene, men ho er ei av dei mest autentiske. Heile livshistoria til kyrkja er bevart – frå mellomalderen til vår tid.

I denne boka får stavkyrkja fortelje si eiga historie. Det er ei forteljing om kontinuerleg bruk. Gjennom hundreåra var dette bygget eit midtpunkt i tilværet for folket i Uvdal. Tru, ritual og tradisjonar har i 850 år sett avtrykk i bygget – og i samfunnet.

Slik blir den vesle kyrkja ein portal inn i den norske kulturhistoria. Forteljinga hennar blir noko meir enn soga om ei einskild fjellbygd. Dei aller fleste nordmenn budde på små stader som Uvdal. Over tusen trekyrkjer knytte desse menneska saman i ulike fellesskap; med kvarandre, med Gud og forfedrane, og med Nidaros og Roma, ei landsomfattande og verdsvid kyrkje.